Жалал-Абад. Элдик курултайдын катышуучулары 7 пункттан турган резолюция кабыл алышты

Бүгүн, 25-мартта Жалал-Абад шаарында болуп өткөн элдик курултайдын катышуучулары 7 пункттан турган резолюцияны кабыл алышты. Бул тууралуу мэриянын басма сөз кызматы билдирди.

Маалыматка ылайык, аталган жыйындын натыйжасында катышуучулардын сунуштары менен 7 пункттан турган резолюция кабыл алынды.

1. Бажы союзун референдум аркылуу кабыл алуу;

2. Чек ара жаатындагы маселелерди тез арада чечүү;

3. Жаш активисттерден жана жаңы кадрлардан турган жаңы өкмөттү түзүү;

4. КСДП фракциясына өкмөттү түзүүгө укук бербөө, анткени мурунку эки жолку аракети натыйжа берген жок;

5. "Коррупция менен күрөшүү" деген шылтоо менен президенттин оппоненттерине болгон күрөштү токтотуу;

6. Июнь окуялары боюнча иликтөө иштерин аягына чыгаруу;

7. Мамлекеттик телеканалдардын коомчулукта болуп жаткан окуяларды объективдүү жана ачык айкындап көрсөтүүсү.  

Ошондой эле катышуучулар уюштуруу комитетине азыркы өкмөттү кетирүү жана ар түрдүү акцияларды өткөрүү максатында жаңы саясий кыймылды уюштурууну өтүнүштү.