Гемодиализ алган бир бейтапка мамлекет жылына 800 миң сомдон ашык каражат сарптайт

Гемодиализ алган бир бейтапка мамлекет жылына 800 миң сомдон ашык каражат сарптайт. Ал эми 425 бейтапка 360 миллиондон ашык каражат жумшалат. Бул тууралуу бүгүн, 3-апрелде Саламаттыкты сактоо министрлигине караштуу Медициналык жардамды уюштуруу жана дары-дармек саясатынын башкармалыгынын бөлүм башчысы Талант Арстанкулов билдирди.

“Бир гемодиализдин сеансына орто эсеп менен 5-7 миң сом сарпталат. Гемодиализдин сеансы 3-4 саатка уланат. Бул убакыт аралыгында гемодиализ бөйрөктүн толук кандуу ишин аткарып, бейтаптын каны толугу менен тазаланат. 7 миң сомдун ичине колдонулган медициналык каражаттар кирет. Сеанс учурунда чыпка түтүгү, диализатор сыяктуу аппарат тетиктери жаңыланып турушу зарыл. Ошондой эле бул баанын ичине гемоглобинди көтөрүп, канды суюлтуучу бир катар дары-дармектер кирет”,- дейт Талант Арстанкулов.

Анын айтымында, абалы орто бейтап айына 12 гемодиализ сеансын алат. Ал эми акыбалы өтө оор бейтаптар күнүнө 12 гемодиализ сеансына муктаж болуп калышат.