Таластагы митинг: Бакай-Атада абал туруктуу, буулган жол ачыла элек (фото)

Акыркы сааттарга карата Бакай-Атада абал туруктуу. Жабылган жол ачыла элек. Барган сайын элдин саны артууда. Бул тууралуу Бакай-Ата районунун тургуну Руслан Чолпонбеков бүгүн, 4-апрелде билдирди.

Анын айтымында, чогулган эл бийлик өкүлдөрүн күтүп жатат.

“Учурда 500дөн ашык эл чогулду. Бүгүн Коргоо, коопсуздук жана чек ара маселеси боюнча вице-премьер-министр Абдырахман Маматалиев келет экен. Эл аны менен жолугушууну күтүп жатат”,- деди Руслан Чолпонбеков.

Айта кетсек, кечээ, 3-апрелде Талас облусунун Бакай-Ата районунда жашоочулар митингге чыгышкан. Алар “Шыраалжын” кенин жабуу талабын коюшуп, кийин Боо-Терек айылында Талас – Тараз унаа жолун бууп салышкан. Бул учурда милиция кызматкерлери элди таратууга аракет кылышкан. Бирок чогулган эл көнбөгөндүктөн, эки тараптын ортосунда кагылышуу чыгып, эки милиция кызматкери сабалып, бир унаа өрттөлгөн.