Өзбекстан чек арасын улам жылдырып келе жатканын, Өзгөндүн жолу буулуп калышы мүмкүн экенин айтышты депутаттар

Өзбекстан чек арасын улам жылдырып келе жатат, Кыргызстандын айрым жолдору жабылып калуу коркунучунда. Муну Жогорку Кеңештин 10-апрелдеги жыйынында депутат Уланбек Нуркулов айтып чыкты. Депутат Жалал-Абад облусундагы Барпы айыл аймагын мисал келтирди. “Өзбекстан чек арасын улам 2 метрден жылдырып отуруп жолго келип калганын айтышууда. Үйлөр курула баштады, коңшу өлкө тарапка. Чек арачылар жетишпейт, кайдыгер боло берсек, Өзгөндүн негизги жолу жабылып калбасын”,- деп билдирди депутат.

Нуркулов Шамалды-Сайдагы көрүнүштү да айтты.

“Шамалды-Сайда Өзбекстандын посту бар. Мурда ал пост трассадан 1 чакырым алыста турчу. Эми ошол жерден чек ара тартышы мүмкүн. Баткенге көңүл буруп, Жалал-Абаддагы чек ара көйгөйү калып кетти”,- деди Нуркулов.