14-апрель күнү Орусияда "паспортуна башка бирөөнүн сүрөтүн чаптап алган" деп айыпталып жаткан кыргызстандык жаран боюнча сот өкүмү чыгат

Орусиянын Москва шаарында паспортундагы сүрөтүнө окшошпогону үчүн кармалган кыргызстандык жаран Маратбек Эшанкуловдун иши боюнча 14-апрелде сот өкүм чыгарат. Бул тууралуу кечээ, 10-апрелде орусиялык басылмалар жазып чыгышты.

Маалыматтарга ылайык, айыпталып жаткан адам 2010-жылы Кыргызстандан Орусияга жумуш издеп келген. Ал убактылуу жумушка уруксат алып, куруучу болуп иштеп баштаган. Бир жылдан соң Кыргызстанга кайтууга аракет кылганда, аэропорттогу чек ара кызматкерлери аны “жасалма паспорт жасаган” деп айыптап, кармап кетишкен. Кыргызстандын жараны Маратбек Эшанкулов үч сутка камакта отурган. Ал юрист жана туугандарынын жардамы менен бошотулган. Бирок күч органдары ага карата “чек араны мыйзамсыз кесип өтүү” беренеси боюнча кылмыш ишин козгоп, "башка бирөөнүн сүрөтүн чаптап алган" деп айыптап баштаган. Ушунун себебинен Маратбек 2,5 жылдын ичинде бир нече жолу камакка алынып, анын иши боюнча сүрөттүк экспертизалар өткөрүлгөн. 2014-жылдын 14-апрелинде Москва шаардык соту Маратбек Эшанкуловдун иши боюнча өкүмүн чыгарат.