Кыргызстанда каттоодон өткөн 991 888 автоунаа бар, анын 127 миңи оң рулдуу

2013-жылдын 31-декабрына карата Кыргызстанда каттоодон өткөн автоунаалардын саны 991 888ди түздү. Муну ички иштер министри Абдулда Суранчиев өкмөттүн 11-апрелдеги жыйынында билдирди. Министрдин билдиришинче, өлкөдө 127 383 оң рулдуу унаа бар (жалпы унаалардын 13 пайызын түзөт). Рулу оң жагындагы унаалар жол кырсыктарынын өсүшүнө себеп болуп жатканын айткан министр: “Мындай унаалар жалпы унаалардын 13 пайызын гана түзгөнү менен, кырсыктардын көрсөткүчү ушундай унаалардын арасында жыл сайын өсүп жатат. 2013-жылы катталган жол кырсыктарынын жалпы санынан алардын салыштырмалуу көрсөткүчү 21,4 пайызга өскөн”,- дейт.

Айта кетсек, акыркы жылдары оң рулдуу унааларды өлкөгө киргизбөө демилгеси активдешти. Буга автоунаа бизнеси менен алектенгендер каршы. Калктын арасында да каршылар көп.