Казакстандын музейине кишинин терисинен тигилген капчык коюлду

Казакстандын Актаудагы музейине өзгөчө экспонат коюлду. Ал - кишинин терисинен тигилген, өлчөмү 10Х15 сантиметр болгон капчык. Төрт бөлүктөн турган бул экспонатты Улуу Ата Мекендик согуштун ардагери музейге 1995-жылы эле тапшырган. Бирок ал фонддо гана сакталып, көргөзмөлөргө көп коюлбай келген. Музейдин кызматкерлери Улуу Жеңиш майрамына карата аны көргөзмөгө коюуну чечишти. Бул тууралуу бүгүн, 21-апрелде чет элдик маалымат каражаттары жазып чыгышты.

Маалыматка ылайык, акча каражатынын тартыштыгынан улам тарыхчылар бул капчыктын качан, кайда, ким тарабынан жасалгандыгын изилдешкен эмес. Алар "капчык концлагерлердин биринде жасалган болуш керек" деп болжомолдошууда. 

Белгилей кетсек, буга чейин эле тарыхта адам терисинен сумка, кол кап, ал эми майынан самын жасап келгендиги анык болгон.