Садык Шер-Нияз, Эрнест Абдыжапаров, Актан Арым Кубат, Камчы Сарыбаев, Аскат Сулайманов жана башка маданияттын кызматкерлери Өкмөт үйүнүн алдына барып өкүрүштү (фоторепортаж)

Бүгүн, 24-апрелде 40ка жакын маданият кызматкери Өкмөт үйүнүн алдына өкүрүп барды. Катышуучулардын айтымында, бийлик өкүлдөрүнүн көңүлүн маданиятка буруу максатында уюшулган флешмоб - маданият кызматкерлеринин жан дүйнөсүнүн кыйкырыгы.

Аталган флешмоб “Кайран заман” деп аталат. Ага режиссёрлор Садык Шер-Нияз, Эрнест Абдыжапаров, "Дем" театрынын жигиттери, сүрөтчүлөр, жазуучулар, акындар катышты. Т.Абдумомунов атындагы Кыргыз драма театрынан алдына чогулган жоон топ өкүргөн боюнча Өкмөт үйүнүн алдына барып, анын алдында 1-2 мүнөт туруп, эч кимдин чыгышын күтпөй эле тарап кетишти.  

Флешмобдун катышуучусу, режиссёр Садык Шер-Нияз: “Кыргыз элинде таланттар көп, ал эми аларды көтөргөн механизм иштебей жатат. 20 жылдан бери маданият жөнүндө мыйзам аткарылбай келет. Бизге берилген 3 пайыз жардамдын 1 пайызын гана алабыз. Ушинтип отурсак кантип биз маданиятты көтөрөбүз?! Бүгүнкү күндө клубдар аткана болуп калды, ал жакта мал багып жатышат. Минтип маданиятты көтөрүү мүмкүн эмес. Маданияттын идеологиясын көңүлгө албай, мамлекетти көтөрүү мүмкүн эмес. Буга чейин өз алдыбызча айтып, кыйкырып келгенбиз, бүгүн чогулуп ыйлап коюуну чечтик”,- дейт.

Ал эми кинорежиссёр Эрнест Абдыжапаров: “Биз 20 жылдан бери мамлекеттен тыйын сурабай эле, саясий талап койбой эле келгенбиз. Көптөгөн революциялар болуп жатат, Ош окуясы болду. Эл аны өзү, маданияты, акыл-эси менен токтотту. Биз өкмөттү ушуларга көңүл бурдуралы деп жатабыз. Кыргыз элинин келечегин оңдош үчүн биз менен кеңешкиле, бизден сурагыла, биз барбыз, бизди эскерип жүргүлө деп “Кайран заман” аттуу өкүрүк менен чыктык. Эгер бийлик маданиятка көңүл бурбай ушул нукта кете берсе, анда мамлекетибиздин келечеги жок”,- деген оюн билдирди.