"Тергөөчү тарабынан сабалды" делген жактоочу чындыкка туура келбеген нерселерди айтып жатат" дейт Ош шаардык ички иштер башкармалыгы

Кечээ, 1-майда жактоочу Динара Турдумаматованы Ош шаардык ички иштер башкармалыгынын тергөөчүсү З.Бекмурзаев өзүнүн иш бөлмөсүндө ур-токмокко алган. Бул тууралуу бүгүн, 2-майда "Эдвокаси" адам укугун коргоо борбору билдирди.

Маалым болгондой, Ош ШИИБинде аталган тергөөчү мыйзамсыз курал-жарак сактоо фактысына шектелип кармалган 3 адамды суракка алып жаткан. Аны аталган жактоочу Динара Турдумаматова өз телефонуна тартып алган. Ошол учурда тергөөчү З.Бекмурзаев жактоочудан видеону өчүрүүнү талап кылган. Бирок Динара Турдумаматова анын талабын аткаруудан баш тартканда тергөөчү анын колун кайрып, телефонун күч менен тартып алган жана үч жолу башка урган. Натыйжада Динара Турдумаматова денесинен жаракат алып, ооруканага түшкөн. 

Бул тууралуу ШИИБдин басма сөз катчысы Замир Сыдыков: "Бул айым чындыкка дал келбеген нерсени айтып жатат. Эгер кааласаңар экөөнү бет маңдай отургузуп сүйлөштүрүп көргүлө, чындык ким тарапта экенин билесиңер",- деди.