Бишкекте “Modern Talking” тобунун солисти Томас Андерс концерт берди (фото жана видеорепортаж)

3-майда Бишкекте биринчи жолу “Ала-Тоо” эс алуу борборунун амфитеатрында легендарлуу “Modern Talking” тобунун солисти Томас Андерс концерт берди. 1980-жылдары Германиядан чыккан бул топ убагында дүйнөнүн эң популярдуу тобу болгон. Топтун жүрөктөн чыккан хит ырларына чоңойгон улуу муундун өкүлдөрү жана жаштар бүгүнкү концертте Томас Андерстин жандуу үн менен аткарган чыгармаларына кулак төшөштү. Ошондой эле жагымдуу чыгармалар аткарылып жатканда көрүүчүлөр жарпын жаза бийлеп, ырчыны дүркүрөгөн кол чабуу, кыйкырык-сүрөөн менен коштоп турушту.

Концерттин уюштуруучусу Ислам Сатаров: “Негизи эле дүйнөлүк масштабдагы жылдыздын Кыргызстанга келиши - бул өзү фантастика. Томас менен жарым жыл мурун таанышкам. Бат эле тил табышып кеттик. Сүйлөшүүлөрдү жүргүзгөндөн кийин ал биздин мекенге келип концерт берүүгө макулдугун берди. Көргөнүңүздөй, эл мыкты кабыл алды. Белгиленген 60 мүнөттөн узагыраак болду. Уюштуруу жагынан кемчиликтер болгон жок, бардыгы ойдогудай өттү. Таң калганым, дүйнө жылдыздары бир ай калганда концерттин жүз пайыз акчасын алышса, мен болсо Томаска келгенден кийин бердим. Канча каражатка келгени коммерциялык сыр, аны айтуунун кажети жок”,- дейт.

Болдукан Анапияева, 45 жашта, көрүүчү: “Биз студент кезде “Modern Talking” тобунун ырларына бийлечүбүз. Мен Томасты кумир тутуп, абдан жакшы көрөм. Концертке келерде ага окшош кишини чыгарып коёт го деп ишенбей жаткам. Келип анын чыгармачылыгына күбө болгонума, өзүн көргөнүмө бактылуу болуп жатам”,- деп кубанычы менен бөлүштү.

Маалымат үчүн айта кетсек, бул концерттин билеттери 1000 сомдон 1500 АКШ долларына (6 адамга ылайыкталган VIP-орундуктар тамак-ашы менен) чейин сатылган.