Бишкектеги №1-шаардык клиникалык ооруканада бейтаптын курсагынан салмагы 14 килограммдан ашуун киста алынды

Бишкектеги №1-шаардык клиникалык ооруканадан бейтаптын курсак жайынан 14,5 килограммдык киста (сары суу же ириң толуп калталанган шишик) алынды. Бул тууралуу бүгүн, 8-майда аталган оорукананын профессору Акылбек Мусаев билдирди. 

“Ооруканабыздын хирургия бөлүмүнө ичи аябай чоңоюп кеткен 50 жаштагы арык чырай аял кайрылган. “Ичим чоңоюп кетип, оорутуп жатат” деген айымдын айтымында, ичи акыркы 3-4 айдан бери чоңоюп, соңку эки күндөн бери оорутуп келген. Бейтаптын ичин ультрадобуштук изилдөөдөн өткөргөндө курсагында көлөмү чоң киста бар экени аныкталган”,- дейт А.Мусаев.    

Бейтап тиешелүү даярдыктардан өткөн соң ага операция жасалды. Анын курсагынан 14,5 килограммдык шишик алынды. Бир жумадан кийин ал үйүнө чыгарылган.

“Өзү арык келген аял 15 килограммга жакын кистаны кантип көтөрүп жүргөнүнө таң калдык. Мынчалык чоң көлөмдөгү киста боюнча биринчи жолу операция жасалды. Буга чейинки жасалган операциялардагы кисталардын салмагы 1 килограммга жеткен эмес. Көбүнүн салмагы 200-300 граммды гана түзүп келген", - деп кошумчалады А.Мусаев.