Тайырбек Сарпашев: "Салык кызматы бюджеттеги каражат чогултуучу системдердин бири болгондуктан, ага болгон талапты күчөтүү керек"

Эгер бюджетке түшкөн 1-квартал ичиндеги салыктык төлөмдөрдү толтура албоо боюнча суроолор жоюлбаса, ал ошол бойдон чечилбей кала берет. Бул тууралуу бүгүн, 12-майда биринчи вице-премьер-министр Тайырбек Сарпашев Салык кызматынын 2014-жылдын 1-кварталынын иштеринин жыйынтыгы боюнча өтүп жаткан коллегиянын отурумунда билдирди.

“Салык кызматында куттуктап же сүйүнө турчу эч нерсе жок. Бюджетке түшүүчү салыктык төлөмдөрдү көбөйтүү максатында ал бир өндүрүшкө эсептегич же видеокамераларды орнотуу зарыл. Салык кызматы - бюджетке каражат чогултуучу системдердин бири. Ошондуктан биз ага болгон талапты күчөтүшүбүз керек”,- деди Т.Сарпашев.

Анын айтымына караганда, Бажы кызматы былтыр пландык көрсөткүчтөрдү убагында аткарууга үлгүрбөй, бирок жыйынтыгында пландык көрсөткүчтөрдү толтурууга жетишти. “Эгер Салык кызматы 1-кварталдын пландык көрсөткүчтөрүн толтурбаса, мындан кийинки абал деле өзгөрүлбөйт. Ошол себептүү мекеменин жетекчилиги муну өз көзөмөлүнө алуусу керек”,- деп кошумчалады Т.Сарпашев.

Эске салсак, Салык кызматы үстүбүздөгү жылдын 1-кварталы боюнча 89,4 пайыз салыктык төлөмдөрүн чогултту.