Сузак районунда "Хизбут-Тахрир" диний-экстремисттик уюмунун мүчөлөрү кармалды

Жалал-Абад облусунун Сузак РИИБинин 10-бөлүмүнүн кызматкерлеринин ыкчам аракеттеринин натыйжасында "Хизбут-Тахрир" диний-экстремисттик уюмунун мүчөлөрү кармалып, үйлөрү тинтүүгө алынды. Бул тууралуу Жалал-Абад ОИИБинин басма сөз кызматы бүгүн, 13-майда билдирди.

Маалыматтарга караганда, 2014-жылдын 12-май күнү Сузак районундагы Жаңы-Чек участкасындагы 1968-жылы туулган Абдуллаев Минхажидиндин үйүнө тинтүү жүргүзгөн учурда 1 даана ноутбук, 1 даана флеш-карта, 49 даана DVD диск табылган. 

Ошондой эле Сузак районунун Арал айылынын тургуну, 1967-жылы туулган Мажитов Шамшиддин үйүнө тинтүү жүргүзгөндө 9 даана китеп, 3 даана дептер, 8 даана DVD диск, 3 даана уюлдук телефон алынды.

Азыркы убакта бул алынган далил буюмдар экспертизага жиберилип, кармалган жарандардын үстүнөн алдын ала тергөө амалдары жүргүзүлүүдө.