Жеңишбек Сайдиевдин өлүмүнө шектелип кармалгандар Орусияда дагы бир адамды балка менен өлтүрүшкөнү айтылууда

Жеңишбек Сайдиевдин өлүмүнө шектелип кармалган жарандар Орусиянын жарандыгын алган кыргыз улутундагы адамдын да өлүмүнө тиешеси бар экендиги айтылууда. Бул тууралуу бүгүн, 14-майда ИИМдин басма сөз кызматы кабарлады.

Маалым болгондой, "Жеңишбек Сайдиевди атып кеткен" деген шек менен Таалай Нуриев жана Ислам Султанов аттуу жарандар кармалышкан. Иликтөөдө алар дагы бир адам өлтүрүүгө шектүү экени аныкталды.

Буга чейин алар Орусияда жашап келишкен. Ал жактагы Омск шаарындагы “Шанхай” базарында иштеген өз жердештерин коркутуп алардан акча алышып, күч көрсөтүшкөнү белгилүү болду.

Ушул жылдын 19-апрель күнү Омск шаардык полициясына И.А. аттуу жаран кайрылып, Ош облусунда туулган, кийин Орусиянын жарандыгын алган А.Мурзаев аттуу күйөөсү дайынсыз жоголуп жатканын кабарлаган. Кийин жоголуп жаткан жарандын жансыз денеси табылган. Аны белгисиз адамдар балка менен башка чаап өлтүргөнү аныкталган.

Омск полициясы аталган кылмышка жумушсуз жүргөн, Ош облусунан келген Таалай Нуриев жана Ислам Султанов аттуу жарандар шектүү экендигин аныкташкан. Бирок аларды кармагыча шектүүлөр Кыргызстанга из жашырып кетишкен.

Эске салсак, 30-апрель күнү саат 15:17 чамасында азиат улутундагы 30-35 жаштардагы белгисиз адам Кара-Суу районунун Дыйкан-Кыштак айылынан жеке ишкер Жеңишбек Сайдиевге аңчылык мылтыгынан эки ирет ок атып качып кеткен. Алган жараатынан улам Жеңишбек Сайдиев 1-майда ооруканада көз жумган болчу. Кийин анын өлүмүнө шектүү катары жогоруда аттары аталып келген Таалай Нуриев жана Ислам Султанов аттуу жарандар кармалышып, алар жеке келишпестиктердин айынан Сайдиевге ок чыгарышканы айтылган.