"13 миллион сомдон ашык каражатты өзүнө ыйгарып, алдамчылыкка барган" деп шектелип издөөгө алынган айым Бишкек шаарынан кармалды

"13 миллион сомдон ашык каражатты өзүнө ыйгарып, алдамчылыкка барган" деп шектелип издөөгө алынган айым Бишкек шаарынан кармалды. Мындай маалыматты Бишкек ШИИББинин басма сөз кызматы бүгүн, 14-майда билдирди.

Маалыматтарга караганда, 52 жаштагы Жаманкулова Сарика аттуу айым Улуттук көркөм сүрөт академиясында бухгалтерлик кызматта иштеп жүрүп аталган жайдын кассири менен биргеликте кылмыштуу келишимге барышкан. Жыйынтыгында алар 13 миллион 860 миң сом бюджеттик акчаны өздөрүнө ыйгарып алышкан.

Буга катар эле С.Жаманкулова өзүнүн таанышына биргелешип ишкерлик кылууну сунуштап, 50 миң АКШ долларын алган соң белгисиз тарапка из жашырып кеткен. Учурда аталган айымдын үстүнөн “кызмат абалынан кыянаттык менен пайдалануу” жана “кызматтык ыйгарым укуктардан аша чабуу” беренелери менен кылмыш иши козголуп, иликтөө иштери жүрүүдө.