Мирбек Атабеков, Султан Садыралиев, Омардын хит ырларынын автору, акын кыз Кундуз Качкынбаева ак жоолук салынып, турмуш жолуна аттанды

Мирбек Атабековдун "Күндөр жаңырат", "Кыргызстан", "Эл тилеги", "Сага", Султан Садыралиевдин "Эгиз жүрөк", Нурмат Садыровдун "Сүйгөн жүрөк", Арсендин "Тагдырың сага жазганда..." ырларын укпаган жан жок болсо керек. Кыргыз эстрада жылдыздарына мына ушундай хит ырларды жазып берип жүргөн таланттуу акын кызыбыз Кундуз Качкынбаева кечээ, 14-майда ак жоолук салынып, турмуш жолуна аттанды. Акынды куттуктап коюу үчүн телефон чалганыбызда, үнүнөн толкунданып жатканы байкалып турду.

"Турмушка чыккандагы сезим бир башкача болот турбайбы. Учурда түшүмдөн ойгонгондой болуп, бир башкача сезимде жүрөм. Жолдошумдун аты - Мирлан. Тоң районунун Көк-Сай айылынын кулуну. Кечээ, 14-майда кайын журтум кыргыздын каада-салты менен мени үйдөн алып кетишти. Ушул эле күнү Бишкектеги ресторандардын биринде жакын туугандарыбыздын, дос-курбуларыбыздын курчоосунда заманбап тоюбузду өткөрдүк. Азыр жолдошумдун кичи мекенине сапар тартканы турабыз",- деп жакшылыгы менен тең бөлүштү.

Анын айтымында, эки жашты бул жакшылыгы менен ырчылар Токтобек Асаналиев, Мээрим Карыпова, Гүлзат Байзакова, Мирбек Атабеков, Омар, Акбар Сүйүнбаев, Султан Садыралиевдер куттуктап кетишти.