Супер-Инфо
super.kg видео
"Супер-Инфо" гезитинин 2013-жылдагы тандоосу боюнча "Жылдын супер тасмасы" аталган "Салам, Нью-Йорк!" тасмасы “Ак илбирс” Улуттук киносыйлыгына татыды (фоторепортаж)
Бүгүн, 17-майда Бишкектеги "Манас" кинотеатрында 2013-жылдын эң мыкты тасмаларына “Ак илбирс” Улуттук киносыйлыгын тапшыруу аземи болуп өттү. Аземге кыргыз киносуна бараандуу салым кошуп келе жаткан улуу инсандар, келечектен көптү үмүттөндүргөн жаштар жана КРнын Маданият, маалымат жана туризм министри Камила Талиева катышты. Фестивалдын ачылышында кыргыз кинематографиясына салым кошкон бир топ маданий ишмерлер кызыл килемден өтүштү.
Андан соң сыйлык тапшыруу аземине кезек келип, “Эң мыкты фильм” наамын режиссёр Руслан Акундун “Салам, Нью-Йорк!” фильми жеңип алды.
“Ак илбирс” Улуттук киносыйлыгынын жеңүүчүлөрү:
1) “Мыкты тасма” - «Салам, Нью-Йорк!»
2) “Мыкты режиссёр” - Руслан Акун, «Салам, Нью-Йорк!»
3) “Мыкты сценарий” - Сергей Кролевич, Руслан Акун, Гүлжан Токтогулова, «Салам, Нью-Йорк!»
4) “Мыкты оператор” - Акжол Бекболотов - «Көргүм келет».
5) “Мыкты сүрөтчү” - Руслан Токочев, Максат Болотбеков, «Салам, Нью-Йорк!»
6) “Мыкты композитор” - Эрлан Арстанов, Эрмек Керимбаев, «Салам, Нью-Йорк!»
7) “Мыкты үн режиссёр” - Бакыт Ниязалиев, Аманбек Майрамбек уулу, «Кумар»
8) “Мыкты монтаж” - Эльдияр Мадаким, «Салам, Нью-Йорк!»
9) “Мыкты аялдын ролу” - Калипа Усенова, «Кумар»
10) “Мыкты эркектин ролу” - Артык Сүйүндүков, «Кумар»
11) “Мыкты даректүү тасма” - Элнура Осмоналиева, «Биз жашаган мамлекет»
12) “Мыкты кыска метраждуу тасма” - Руслан Акун, «Перегон»
Мындан тышкары “Кыргыз киносунун өнүгүшүнө кошкон салымы үчүн” наамы кыргыздын чыгаан режиссёру Болот Шамшиевге ыйгарылды.
Ал эми “Көрүүчүлөрдүн сүймөнчүк тасмасы” наамы эң жогорку касса чогулткан «Салам, Нью-Йорк!» тасмасынын продюсери Нурбек Айбашевге ыйгарылды.
Кошумчалай кетсек, “Ак илбирс” Улуттук киносыйлыгында "Эң мыкты фильм" деп табылган "Салам, Нью-Йорк!" 2013-жылы "Супер-Инфо" гезитинин таандоосу боюнча "Жылдын супер тасмасы" наамына, ал эми андагы Баатыр аттуу жигиттин ролун жараткан Бектемир Мамаюсупов "Жылдын супер актёру" наамына татыган.
0
1 |