“Кызды өлтүрүп, денесин бөлүктөргө бөлүп салган” деп шектелген жарандын үйүнөн табылган куурулган эт эмненин эти экени аныкталбай калды” дейт Абдулда Суранчиев

“Кызды өлтүрүп, денесин бөлүктөргө бөлүп салган” деп шектелген жарандын үйүнөн табылган куурулган эт адамдыкы же жаныбардыкы экенин адистер аныктай албай коюшту” деп айтты бүгүн, 19-майда кеңейтилген маалымат жыйынында КРнын ИИМинин башчысы Абдулда Суранчиев.

Анын айтымында, табылган эт эмненин эти экенин аныкташ үчүн эки медициналык экспертиза өткөрүлгөн. “Бирок ал өтө куурулуп калгандыктан, соттук-медициналык адистер муну аныктай албай коюшту”,- деди министр.

Эске сала кетсек, үстүбүздөгү жылдын 11-январь күнү эртең менен Бишкек шаарынын Панфилов көчөсү менен темир жолдун кесилишиндеги таштанды таштоочу челектен башы жана ички органдары жок, денеси бөлүктөргө бөлүнгөн жаш аялдын өлүгү табылган. Дене 20дан ашык бөлүккө бөлүнгөн. Аны жуурканга ороп, таштандыга таштап кетишкен. Бул факты боюнча шектелип 1987-жылы туулган Наиль Надиров кармалган. Ага карата "адам өлтүрүү" жана "өлгөн адамдын денесин мазактоо" беренелери боюнча кылмыш иши козголгон. 17-апрелде анын иши сотко өткөн.