Ысык-Көл облусундагы “Алтын-Көл” эс алуу үйүнүн мурунку башчысы "кызмат абалынан кыянаттык менен пайдаланган" деп шектелүүдө

Жогорку Кеңештин карамагындагы Ысык-Көл облусундагы “Алтын-Көл” эс алуу үйүнүн мурунку башчысы "кызмат абалынан кыянаттык менен пайдаланган" деп шектелүүдө. Бул тууралуу Ысык-Көл ОИИБинин басма сөз кызматы бүгүн, 20-майда билдирди.

Маалыматтарга караганда, "Алтын-Көл" эс алуу үйүнүн мурунку башчысы Жогорку Кеңеш тарабынан бөлүнгөн 3 миллион 500 миң сомдун 519 764 сомун өз кызыкчылыгына керектеп койгон. Аталган эс алуу үйүнүн башчысы мындан башка дагы кызмат абалынан пайдалангандыгы жөнүндө 4 факт катталганы белгилүү болду. 

Алсак, 2012-2013-жылдар аралыгында салык мыйзамын бузуп, мамлекетке 1 миллион 860 миң сом зыян алып келген. Учурда Ысык-Көл облустук прокуратурасы тарабынан “Алтын-Көл” эс алуу үйүнүн мурунку башчысына карата “кызмат абалынан кянаттык менен пайдалануу” жана “ишенип берилген мүлктү өзүнө ыйгарып алуу” беренелери боюнча кылмыш иши козголду.