Ош. Чоң-Алай районунун айылдык кеңешинин депутаттары Жогорку Кеңештин ишмердүүлүгү менен таанышты

Жогорку Кеңештин Социалдык саясат, Адам укуктары, конституциялык мыйзамдар жана мамлекеттик түзүлүш боюнча комитеттеринин иши менен таанышкан жергиликтүү депутаттар бүгүн, 21-май күнү парламент жыйынынын жүрүшүнө да күбө болушту.

“Мамлекеттин негизги таянычы - аймактар. Ошондуктан мындай жолугушуулар, тажрыйбаны байытууга багытталган иш-чаралар аймактар менен борборду, борбордук бийлик менен жергиликтүү бийликтин ортосундагы байланышты чындоого багытталган эң натыйжалуу жол десе болот”,- деди Чоң-Алай айылдык кеңешинин депутаты Абдысалам Бөрүбаев.

Эске салсак, буга чейин да республиканын аймактарынан жергиликтүү кеңештердин депутаттары Жогорку Кеңешке экскурсияга келип, депутаттар менен жолугушууларды өткөрүп, фракция, комитеттердин иши менен таанышып кетишкен. Бул тажрыйба салтка айланып, Жогорку Кеңеш менен жергиликтүү кеңештердин карым-катышын бекемдөөгө, парламенттин ишинин ачыктыгын жогорулатууга багытталган.