Бүгүн Үрүмчүдө болгон жардыруунун себептери аныктала элек

Кытайдын түндүк-батыш провинциясынын борбору Үрүмчүдө жардыруу болду. Бул тууралуу 22-майда кытайлык басылмалар жазып чыгышты. Маалыматка ылайык, жардыруу эртең менен саат 08:00 чамасында болгон. Окуя Үрүмчүнүн шаардык базарында болуп, жарылуунун себептери аныктала элек. Алдын ала маалыматтарга караганда, эки унаа кагылышып, өрт чыгып кеткен. 

Кытайдын Синьцзян-Уйгур автономдуу районунда уйгурлар менен кытайлардын ортосунда пикир келишпестиктер байма-бай чыгып келет. Расмий маалыматтарга караганда, мусулмандар аймакта диний согуш баштоону көздөп келишет. 30-апрелде Үрүмчүдөгү темир жолдо теракт болуп, 3 жаран курман болгону жана 79 адамдын жараат алганы айтылган.