Казакстандагы кыргыз диаспораларынын министр Камила Талиевага бойкот жарыялашкандыгы айтылууда

Кечээ, 26-майда Казакстандагы кыргыз диаспоралары жана алардын Орусиядагы, Түркиядагы кесиптештери КРнын Маданият, маалымат жана туризм министри Камила Талиевага бойкот жарыялашканын билдирип, вице-премьер-министр Эльвира Сариевага ачык кат жөнөтүштү. Бул тууралуу бүгүн, 27-майда жергиликтүү маалымат каражаттары жазып чыгышты. 

Маалыматка ылайык, алар өз катында мындан ары министр Камила Талиева Абдыразаковна катышкан иш-чараларга бойкот жарыялай тургандыктарын жана анын чакырууларынан баш тарта тургандыктарын билдиришкен. "2014-жылдын 3-майында "Кыргызстан-Астана" этномаданият коому Токтогул Сатылгановдун 150 жылдыгына карата "Ала-Тоо булбулу Токтогул" аталышында салтанаттуу иш-чара өткөрдү. Ага Кыргызстандын жана Казакстандын белгилүү маданият ишмерлери катышкан. Бул иш-чара тууралуу маалымат каражаттарына маек бергенде министр Камила Талиева уюштуруучулар жөнүндө бир ооз сөз кылбай, "биз барып келдик, өткөрүп келдик" дейт экен",- деп нааразычылыктарын билдиришкен. 

Бул ачык кат тууралуу вице-премьер-министр Эльвира Сариевага чалганыбызда, анын жардамчысы "Азырынча бизге расмий түрдө бул ачык кат түшө элек. Биз бул тууралуу маалымат каражаттарынан окудук. Учурда тактоо иштерин жүргүзүүдөбүз" деген жооп узатты.