Москванын тургуну эки бөлмөлүү батиринде 200 итти багууда

Эки бөлмөлүү батирге канча итти батырса болот? Бул суроонун жообун эми Москва шаарында жашаган Наталья Кулешованын кошуналары билишет. Алар буга чейин иттердин үргөнүнө жана алардын каңырсыган жытына чыдап келишкен. Бирок кошунасынын эки бөлмөдө 200 ит багып жатканы алардын оозун ачырды. Бул тууралуу бүгүн, 28-майда орусиялык маалымат булактары жазып чыгышты.

Маалыматка ылайык, Натальянын кошуналары анын 15 жылдан бери ит багып сатарын билишчү. Бирок мынчалык көп санда деп ойлошкон эмес. Анын түрдүү породадагы көп сандаган ит багары астындагы кошунасынын үйүнө суу каптатып жибергенде билинип отурат. 

Алгач кошуналар Натальянын маселесин ич ара эле чечип алууну чечишет. Тилекке каршы, эч кандай жыйынтык чыкпаган соң укук коргоо органдарына кайрылышкан. Полиция кызматкерлери келгенде Кулешованын эки бөлмөлүү квартирасы иттер салынган капастарга жык толгону, алар тамаксыз, суусуз жашашары белгилүү болгон. Жаныбарлардын мындай шартта жашаганы кожойкени кызыктырып да койбойт экен. Ал иттеринин үрүп, улуганына да көнүп бүтүптүр. "Иттери кечке улуп-уңшуйт. Чыккан жытты айтпай эле коёлу. Даттансак кулак сыртынан кетирип коёт. Эч кимге эшигин ачпайт. Итин сатарда гана сыртка чыгып, кардар менен жолугушат",- дейт кошуналарынын бири. 

Полиция кызматкерлери кийинки жолу "Тез жардам" унаасын ала келишти. Учурда дарыгерлер Натальянын психикалык жактан жабыр тарткан-тартпаганын аныкташууда. Эгер чын эле жабыркаса, анда иттер жаныбарларды коргоо бөлүмдөрүнө өткөрүлүп берилет.