Жоомарт Оторбаев чек арачыларды Мамлекеттик чек ара кызматынын түзүлгөндүгүнүн 15 жылдыгы менен куттуктады

“Урматтуу Кыргыз Республикасынын Мамлекеттик чек ара кызматынын офицерлери жана жоокерлери!Ардактуу ардагерлер! Сиздерди Кыргыз Республикасынын Мамлекеттик чек ара кызматынын түзүлгөндүгүнүн 15 жылдык мааракеси жана кесиптик майрамыңыздар менен куттуктайм!

Мекен чек арасынын бекемдиги өлкөбүздүн эгемендүүлүгүнүн, бүтүндүгүнүн негизги шарты болуп келген жана болуп кала бермекчи. Бул жооптуу ишти аткаруу мекенге берилген, эрктүү, туруктуу жана чыныгы жоокерлерге гана тапшырылат. Чек ара сакчылары өлкө эгемендигине кол салган негизги соккуну өздөрүнө алып, тайманбастык менен анын мизин кайтарышат.

Чек ара сакчыларынын Улуу Ата Мекендик согуштагы эрдиктери, мекен чегинин ар бир сантиметри үчүн жан аябаган эр жүрөктүүлүгү келечектеги жеңишке негиз салган.

Улуу Ата Мекендик согуштун жана чек ара аскерлеринин кымбаттуу ардагерлери, сиздерге таазим этебиз. Сиздер жоокердик кызматыңыздар менен өзгөчө күжүрмөн боордоштук, Ата Мекенге ак кызмат өтөөнүн салттарын калыптандырдыңыздар.

Сиздердин кесиптик, турмуштук бай тажрыйбаңыздар жаштар үчүн баа жеткис үлгү. Чек арачылар да улуу муундун өкүлдөрү калтырган чек ара салттарын бекем тутуп, Кыргызстандын аймактык бүтүндүгүн, эгемендүүлүгүн, коопсуздугун сактоо боюнча тапшырмаларын ак ниет менен аткарууда.

Кыраакылык, чебердик, туруктуулук, тартиптүүлүк жана өз кесиби үчүн сыймыктануу, мындан ары дагы чек арачыларды башкалардан айырмалап турарына бекем ишенем.

Бардык чек арачыларды, чек арачы-ардагерлерди ушул майрам күнүңүздөр менен куттуктайм жана чың ден соолук, иштериңиздерге ийгилик, бейпил турмуш, чек аранын бекем болушун каалайм".