Руслан Акун: "Депутат кылмышка шектүү деп санаган "Салам, Нью-Йорк!" тасмасындагы Даниэль тартиптүү, жакшы адам. Депутаттын сөзүнө ишенгим келбей турат"

Бүгүн, 29-майда ЖКнын жыйынында депутат Максат Сабировдун "2006-жылы Бишкектеги мектептердин биринде Азим Чикеев деген баланы Даниэль Бурканов деген классташы бычак менен сайып өлтүргөнү коомчулукка тараган. Кылмышкер баланы психикалык ооруканадан "акыл-эси кем" деген маалым кат алуу менен каттатып, жазадан сууруп кетишкен. Ошол бала эми "Салам, Нью-Йорк!" тасмасында көрүнүктүү ролду аткарып жүрөт. Мына биздин коомубуздун жүзү" деп айтканы учурда маалымат каражаттарында кызуу талкууга алынууда. 

Бул тууралуу аталган тасманын режиссёру Руслан Акундун оюн билүү үчүн чалганыбызда ал буга таң калып жатканын айтты. 

“Мен депутаттын сөзүнө ишене албай турам. Даниэлди таап, аны менен сүйлөшүп, анын пикирин билгим келет. Аны менен Нью-Йоркто таанышканбыз. Сүйлөшүүдөн соң Бурканов жакшы таасир калтырган. Ал тартиптүү, жакшы адам. Ал тасмада экинчи пландагы каармандын ролун, башкы каарманды өз үйүнө жашаганга алган баланын ролун ойногон. Анын ролу позитивдүү жана оң каарман. Мага азыр депутаттын сөзүнө ишениш кыйын болуп турат”,- дейт "Салам, Нью-Йорк!" тасмасынын режиссёру Руслан Акун.