Манасчы Жусуп Мамайды жерге берүү зыйнатына катышуу үчүн кыргыз делегациясы жөнөп кетти

Жусуп Мамайды жерге берүү зыйнатына катышуу үчүн Кытай Эл Республикасынын Кызыл-Суу автономдуу округуна кыргыз делегациясы жөнөп кетти. Тийиштүү жарлыкка КРнын Президенти Алмазбек Атамбаев кол койду. Бул тууралуу 2-июнда президенттин басма сөз кызматы маалымдады. 

Данияр Нарымбаев баш болгон кыргыз делегациясында вице-премьер-министр Эльвира Сариева, ЖКнын Эл аралык иштер боюнча комитетинин башчысы Каныбек Иманалиев жана башка коомчулуктун өкүлдөрү кетишти. 

Эске салсак, 1-июнь күнү эртең менен белгилүү манасчы Жусуп Мамай 96 жаш курагында көз жумган. Жусуп Мамай 1918-жылы Чыгыш Түркстандагы (азыркы Кытай Эл Республикасынын Шинжаң-Уйгур автономдуу районундагы) Ак-Чий ооданынын Меркеч айылында жарык дүйнөгө келген. Ал "Манас" эпосун сегиз урпакка чейин айткан. Анын айтымында бул эпос 500 миң сап ырды түзөт.