Алайдагы жол тоскондордун үстүнөн жеке ишкерлер укук коргоо органдарына арыз менен кайрылышты

Камакта отурган Ахматбек Келдибековдун тарапташтары тарабынан буулуп турган жолдун айынан жүргүзгөн иши токтоп калгандар Ош облустук ички иштер башкармалыгына арыз менен кайрылышты. Бул тууралуу 4-июнда ОИИБинин маалымат катчысы Жеңиш Ашырбаев SUPER.KG порталына билдирди.

Анын айтымында, ишкерлердин товары Кытайдан келе жатып жол тосулган жерде туруп калган. 

“Бизге түшкөн даттануулар көбөйүүдө. Азыркы тапта жеке ишкерлерден 6 арыз түштү. Бул боюнча атайын мекемелер аралык комиссия түзүлүп, келтирилген чыгымдарын эсептеп чыкмакчы. Андан кийин чара көрүлөт”,- деди ал өз сөзүндө.

Эскерте кетсек, 27-майдан бери Ахматбек Келдибековду үй камагына чыгаруу боюнча Алай районунун Сопу-Коргон айылынын тургундары Эркеч-Там унаа жолун буушкан. 2-июндан тарта алар бийликке койгон талаптарын өзгөртүшүп, биротоло камактан чыгаруу талабын коюшкан.