Союз маалындагы белгилүү футболчу Зарлык Султанов бүгүнкү күндө селсаяктай абалда күн кечирүүдө

Бүгүн, 13-июнда Дене тарбия жана спорт мамлекеттик агенттигинин директору Кадырбек Эргешов кыйын абалда жашоо кечирип жаткан СССР спортунун чебери, атактуу футболчу Зарлык Султановдун абалы менен таанышып кайтты. Бул тууралуу аталган агенттиктин басма сөз кызматынан кабарлашты.

Маалыматка ылайык, жолугушуу учурунда 71 жаштагы З.Султанов агенттиктин директоруна маселесин айтып берди. “Буттарымдын оорусунан улам жарым жылдан ашык убакыттан бери өз алдымча баса албай келем. Акча каражатынын жетишсиздигине байланыштуу үйдө оңдоп-түзөө иштери да жүргүзүлө элек. Жакындарым жок, жапжалгыз күн кечирип жатам”,- деди ал.

Өз кезегинде К.Эргешов эртеңки күндөн тарта үйдүн тегереги тазаланып, үйдө оңдоп-түзөө иштери башталарын билдирди. Андан тышкары аталган агенттик башка министрликтер, мекемелер жана Бишкек шаардык мэриясы менен биргеликте изилдөө иштерин жүргүзүп, дарылоо, турмуш-тиричилигине керектүү эмеректер менен камсыздоону колго алат.