"Сулуулардын сулуусу-2014" сынагында 18 жаштагы Ольга Маскаленко жеңүүчү деп табылды (фоторепортаж)

14-июнда Бишкектеги Спорт Ордосунда "Сулуулардын сулуусу-2014" сынагы болуп өттү. Анда 15-24 жашка чейинки 23 кыз ат салышты. Катышуучулар өзүн тааныштыруу, интеллектуалдык деңгээлин көрсөтүү, командалык бийлөө, кече көйнөгү менен чыгуу боюнча тапшырмаларды аткарышты.

Ошондой эле сынактын жүрүшүндө ырчылар Амир Аскаров, Жоодарбешим, Дайыр Исмадияров, “Кеӊеш” тобу көрүүчүлөргө ыр сунушту.

Катышуучулардын талантын дизайнер Замира Молдошева, “Супер-Инфо” гезитинин шеф-редактору Нуркыз Курманбекова, ырчы Дайыр Исмадияров жана башкалардан турган 13 инсан баалады.

Сынактын жыйынтыгында 18 жаштагы Ольга Маскаленко жеңүүчү деп табылып, ага "Сулуулардын сулуусу-2014" наамы ыйгарылды. Ошондой эле Анталияга эс алып келүүгө 2 кишилик жолдомо тапшырылды.

Ал эми төмөнкүлөр кийинки орундарды багындырышты:

“1-вице сулуулардын сулуусу-2014" – Барчын Казакбаева, “2-вице сулуулардын сулуусу-2014" – Фериде Алымбаева.

Сынакты уюштурган “Супер сулуу-2013” сынагынын жеңүүчүсү Орункүл Шабралиева:

“Супер сулуу - 2013” наамын жеңип алгандан бери мени ийгиликтер коштоп келүүдө. Алардын бири деп бүгүнкү менин тушоо кесүү сынагымды айтсам болот. Сынактын максаты - кыздардын ичинен татыктуусун тандап алып, мода чөйрөсүндө иштегенге көмөк көрсөтүү. Көптөгөн сынактардан алган тажрыйбам мага сынакты уюштурууга жардам берди. Кыздарды бир жарым ай бою дефиле, визаж, өзүн алып жүрүү этикаларына үйрөтүп, даярдап чыктык. Алардын арасында сахнага биринчи жолу чыккандар жана профессионалдар бар. Мени сынак бүткүчө токундоо сезими курчап турду. Жыйынтыгында калыстар тобунун чечими менен татыктуу кыз жеңди деп ойлойм”,- деп сезимдери менен бөлүшүп өттү.

Замира Молдошева, дизайнер, сынактын жыйынтыгы тууралуу: “Жеңүүчүнү аныктоо аябай оор болду. Калыстар тобу менен талашып-тартышып отуруп, Ольганы жеңүүчү деп таптык. Анткени ал өзүн ишенимдүү алып жүрдү. Бардык тапшырмалады мыкты деңгээлде аткарып берди”.

Ольга Маскаленко, жеңүүчү: “Мен сынакка өзүмдү башка жаатта сынап көрөйүн деп эле катышкам. Жеңүүчү болом деп ойлогон эмесмин. Кубанычымда чек жок. Сынакты уюштурган Орункүлгө ыраазычылыгымды билдирем. Чынын айтсам, мени мода дүйнөсү кызыктырбайт. Түрдүү тамак-аш бышырганды жакшы көргөндүктөн, келечекте ушул жаатта иш алып баргым келет”.