Баткен. Кызыл-Кыядагы цемент заводунун иши токтоп калуу алдында турат

Ош - Эркеч-Там жолун ЖКнын депутаты Ахматбек Келдибековдун тарапташтары бууп жаткандыгына байланыштуу Баткендин Кызыл-Кыя шаарындагы цемент заводунун иши токтоп калуу алдында турат. Бул тууралуу бүгүн, 18-июнда аталган цемент заводунун долбоорлор боюнча менеджери Кубанычбек Сарыбаев билдирди.

Анын айтымында, цемент заводунун ишин кармап турууга болгону эки жумага жете турган көмүрдүн запасы бар. Ал эми ишкана жетекчилиги бул жагдай туурасында өкмөткө жана Антимонополия агенттигине билдирүү жөнөттү. Завод өндүрүш процессин үзгүлтүккө учуратпай кармап туруу үчүн ай сайын 9 миң тонна көмүр жагылат. От казандары 1000 градустан өтүп ысыйт. Эгерде цемент чыгаруу процесси үзгүлтүккө учураса, аны кайра ишке салуу үчүн 10 миллион сомго чукул каражат керектелерин кошумчалады.

“Бул бир гана от казандарын тийиштүү деңгээлде ысытуу үчүн кете турган чыгым. Ал эми заводдун андан башка жабдыктары да жабыркашы мүмкүн. Кызыл-Кыядагы цемент заводу быйылкы жылдын планы боюнча 750 миң тонна цемент чыгаруусу керек. Өндүрүлгөн цемент Жалал-Абад, Баткен, Ош облустарын жана коңшу Тажикстандын айрым аймактарын камсыздайт. Жол тоскондор болбосо, күнүнө 400 тоннага чейин көмүр алынып келип турчу”,- дейт ал.