Филиппинде өлүм алдында жаткан жигит ооруканадан үйлөнүү салтанатын өткөрүп, 10 сааттан соң каза тапты

18-июнда Филиппинде өлүм алдында жаткан жигит ооруканадан үйлөнүү салтанатын өткөрүп, никеге турду. Ага эки жаштын жакындары катышып, көз жашын тыя албай турушту. Алардын үйлөнүү салтанаты учурундагы видео жигиттин агасы тарабынан социалдык тармактарга жайгаштырылып, аны бир нече күндүн ичинде эле  5 миллиондон ашык адам көргөн. Учурда бул видео кароо жагынан рекорддук көрсөткүч жаратууда. Бул тууралуу бүгүн, 27-июнда чет элдик маалымат каражаттары жазып чыгышты.

Маалыматка ылайык, рак оорусу менен алышып келген Роуден Го ооруканадан сүйүктүүсү Лизлге сүйүүсүн билдирип, нике шакегин салды. Тилекке каршы, 10 сааттан соң жигит бул жарыкчылык менен коштошкон. Алгач эки жаш үйлөнүү тоюн 8-июлга белгилешкен. Бирок дарыгерлер Роуденден рактын оор түрүн табышып, мындан улам алар чукул арада үйлөнүүгө мажбур болушкан. Роуден менен Лизлдин 2 жаштагы кызы бар.

Колдонуучулар эки жаштын сүйүүсүнө жогорку баа берип, Лизлге көңүл айтышууда.