Испанияда наристелердин үстүнөн секирген эң коркунучтуу фестиваль өткөрүлдү

Европадагы эң таң калтырарлык жана коркунучтуу фестивалдардын бири - El Colacho. Бул фестиваль 1620-жылдан бери Испаниянын Кастрильо-де-Мурсия шаарында өткөрүлүп келет. Бул тууралуу чет элдик басылмалар 8-июлда жазып чыгышты.

Салтка ылайык, бир канча жергиликтүү тургун шайтанды сүрөттөгөн сары-кызыл костюм жана бет кап кийишип, 1 жашка толо элек наристелердин үстүнөн секиришет. Балдар шаардын башкы аянтына төшөлгөн матрастын үстүнө жаткырылат. 

Чет элдик басылмаларга таянсак, мындай ыкма менен алар наристелерди күнөөдөн арылтып, көз тийүүдөн, оорудан, кара күчтөрдөн сакташат. Алардын билдирүүсүнө караганда, шайтандын образын берген эркектер секирип жатканда жамандыктар алардын артынан ээрчийт да, муну менен наристелердин жандары тазаланат. 

Бул ырым-жырым аяктагандан кийин фестивалдын катышуучулары бийлеп, ырдап көчө майрамын уюштурушат. Бул фестивалдын тарыхында бир дагы наристе зыян тарткан эмес.