Ош шаарында 17 имараттын мыйзамсыз курулуп жатканы аныкталды

Бүгүнкү күндө Ош шаарында архитектурадан уруксаты жок, мыйзамсыз 17 курулуш бар. Бул тууралуу SUPER.KG порталына шаардын вице-мэри Жапар Ормонов билдирди.

Анын айтымында, шаарда курулуп жаткан бир катар имараттардын архитектуралык иш кагаздары жок. Ошого карабастан, көп кабаттуу үйлөрдүн 5-кабатына чейин бүткөрүлгөндөрү бар.

“Бүгүнкү күндө 17 мыйзамсыз курулуп жаткан имаратты аныктап, атайын комиссия түздүк. Себеби уруксаты жок болуп, курулуп бүткөрүлүп калса, имараттын сапаты үчүн биз, шаардык мэрия жоопко тартылып калабыз. Ошол себептүү тез арада курулуштун сапатын аныктап, эгер курууга мүмкүн болсо, керектүү документтерди бүткөрүүгө жардам беребиз. Мыйзам боюнча, экотехникалык инспекциядан курууга уруксат алынышы керек болчу. Эгерде курууга такыр болбосо, аны биз канча кабаттуу болбосун, сүрдүрүп салууну чечтик. Кечээ ошол имараттарга сатылып жаткан электр энергиясы менен сууну убактылуу берүүнү токтоттурдук”,- деди вице-мэр.