"Чоңдор келгенде гана сугат суу келе баштайт" деп арызданышты дыйкандар

"Быйыл сугат суу келбей, абдан кыйналдык. Биздин чиновниктер журналисттер менен келгенде гана суу агып, алар кеткенде кайра токтоп калат",- деп арызданышты бүгүн, 11-июлда Панфилов районундагы Октябрь айылынын дыйкандары.

Алардын бири Эркебай Умарбакиевдин айтымында, буга чейинки жылдары суу маселеси мынчалык оор эмес болчу. “Суунун жоктугунан дыйкандардын айласы кетүүдө. Суусу бар айылдарга кетмен көтөрүп алып барып, арыктардан суу буруп келүүгө даяр болушууда. Анткени дыйкандардын басымдуу бөлүгү насыяларынан кутулушу керек. Жакында суу келе баштаса да, кирешенин 30 пайызын сактай албай калабыз”,- деди ал.

Айта кетсек, бүгүн, 11-июлда КРнын Биринчи вице-премьер-министри Тайырбек Сарпашев Чүй облусуна иш сапары менен барып, сугат суу маселеси менен таанышып келди. Дыйкандар менен жолугушууда "сугат суу Казакстанга сатылып жатат" деген сөздөр чындыкка туура келбейт" деп, көйгөйдү тамчылатып сугаруу ыкмасы менен чечүүнү сунуштады.