Күмөндөр Абылов: "Элдин жүрөгүнөн орун алган куудул Жаныбек Алыкулов өкмөт тарабынан бир дагы наам албай кете берди"

Куудул, пародист Жаныбек Алыкуловдун сөөгү бүгүн, 21-июлда Ала-Тоо конушундагы бейитке коюлду. Маркум менен коштошуу зыйнатына анын жакын туугандары, мурдагы маданият, маалымат жана туризмди өнүктүрүү министри Султан Раев, коомдук ишмер Ибрагим Жунусов, куудулдар Келдибек Ниязов, Күмөндөр Абылов, Жамбыл Камчиев, Борончу Кудайбергенов, Кубик Калыков, ошондой эле КРнын Эл артисти Түгөлбай Казаков жана башкалар катышышты. 

Маркум Жаныбек Алыкуловдун санаалашы Күмөндөр Абылов: “Жаныбекти “пародияны кайра жаңыртуучу” деп айтсак болот. Тарыхта Бекназар аттуу куудул 40тан ашуун жаныбарды туурачу экен. Бул Жаныбекти “азыркынын Бекназары" деп айтыш керек. Бир гана өкүнүчтүү жери, элдин жүрөгүнөн орун алган куудул өкмөт тарабынан бир дагы наам албай кете берди. Жакем дагы да өмүр сүрүп, балдарынын, неберелеринин тойлорун көрүп, жакшылыктарына күбө болуп кетсе болмок. Айла жок, ажал экен... Бирок биз Жакемди эч качан унутпайбыз! Кош, Жаке! Жаткан жериң жайлуу, топурагың торко болсун”. 

Айта кетсек, Жаныбек Алыкулов кечээ, 20-июлда 54 жаш курагында оорудан улам дүйнө салды. Кыргыз маданиятына салым кошуп, куудул, пародист гана эмес, ырчы катары эл оозуна алынган Алыкулов Аксы районунун Жаңы-Жол айылында 1960-жылы туулган. Анын артында төрт уул, эки кызы калды.