"Жаңы толкун-2014": Алла Пугачёва чыгармачылык кечесинде сүйүнүчтөн көзүнө жаш алды

25-июлдан 26-июлга караган түнү Латвиянын Юрмала шаарында "Жаңы толкун" Эл аралык сынагынын алкагында Алла Пугачёванын чыгармачылык кечеси болуп өттү. Ага катышкан Орусия менен Украинанын ырчылары примадоннанын ырларын аткарышты. Кечени Алла Пугачёванын жолдошу, пародист Максим Галкин алып барды. 

Кристина Орбакайте, Дима Билан, Потап менен Настя, Лолита, Николай Басков, Любовь Успенская, Лайма Вайкуле, Валерий Меладзе өңдүү көптөгөн ырчылар катышкан чыгармачылык кече жогорку деңгээлде өттү. Соңунда Алла Пугачёва өзү сахнага чыгып, бир нече ырын тартуу кылды. Көрүүчүлөр жылуу кабыл алып, ордунан туруп кол чаап, чогуу ырдагандар ырчыны сүйүнүчтөн ыйлатты.

"Жаңы толкун" жаш музыка аткаруучулардын эл аралык сынагы Юрмалада 2002-жылдан бери өткөрүлүп келет. Сынакты өткөрүү идеясы композиторлор Игорь Крутой менен Раймонд Паулска таандык. Алла Пугачёва сынактын музасы аталып, жеке сыйлыгын берип келген.

Сынактагы 2 күндүн жыйынтыгы кошулуп, Кыргызстандын атынан катышып жаткан "Style Mix" триосу 127 упай менен 10-орунда келе жатат. 22-июлда старт алган "Жаңы толкун" Эл аралык сынагында Кыргызстан, Орусия, Украина, Армения, Литва, Казакстан, Италия, Грузия, Германия жана Латвия мамлекеттеринен келген 16 жаш аткаруучу ат салышууда. 26-июлдан 27-июлга караган түнү сынактын үчүнчү күнү орун алат. Анда катышуучулар жаңы чыгарылган ырларды аткарышат.