"Жаңы толкун-2014": Кыргызстандын атынан катышып жаткан "Style Mix" триосу жаңы чыгарылган ырын тартуулашат

Латвиянын Юрмала шаарында өтүп жаткан "Жаңы толкун-2014" сынагынын алкагында бүгүн, 26-июлдан 27-июлга караган түнү сынактын үчүнчү күнү орун алып, анда катышуучулар жаңы чыгарылган ырларды аткарышат.

"Style Mix" триосу сөзү москвалык акын Вениамин Борисовго, обону топтун мүчөсү Адилет Эркинбек уулуна таандык “Жыргал күндөргө умтулуу” ырына обон созушат.

Аталган топ дүйнөлүк хит сынагында британиялык ырчы Jessie J`нин “Price tag” ырын аткарып сынакты ачып беришкен. Өз өлкөсүндөгү хит сынагында болсо “IOWA” тобунун “Жылмай” (“Улыбайся”) ырын ырдашкан. Эки күндүн жыйынтыгы боюнча "Style Mix" триосу германиялык ырчы Глэдис Мвачитини гана артка калтырып, акыркы орундан бир тепкич алдыда келе жатат. 

Быйыл сынакта Кыргызстан, Орусия, Украина, Армения, Литва, Казакстан, Италия, Грузия, Германия жана Латвия мамлекеттеринен 16 жаш аткаруучу ат салышууда.

"Жаңы толкун" жаш музыка аткаруучулардын эл аралык сынагы Юрмалада 2002-жылдан бери өткөрүлүп келет. Сынакты өткөрүү идеясы композиторлор Игорь Крутой менен Раймонд Паулска таандык.