Кыргыздын ак калпагы саркеч үлгүдө тигилип чыгарылат

Кыргызстанда “Борбор азиялык ишкерлер клиникасы” жаңы баштаган ишкерлер үчүн 6 жумалык "Startup Bootcamp" долбоорун өткөргөн. Долбоордун максаты - жаңы идеяларды колдоо жана каражат жагынан көмөк көрсөтүү. Анын алкагында 5 мыкты делген идея тандалып алынган. Командалар 1,5 ай өзүлөрүнүн бизнес-пландарын жана чыгарчу продуктуларынын образын иштеп чыгышып, инвесторлорго тартуулашты. Бул тууралуу “Борбор азиялык ишкерлер клиникасы” уюмунун директору Чубак Бойконов бүгүн, 8-августта SUPER.KG порталына билдирди.

Маалым болгондой, аталган долбоордо жеңип чыккан эмгектердин ичинде дизайнер Искендер Асаналиев катышкан “Туран” командасынын заманбап үлгүдө иштеп чыккан кыргыздын ак калпагы бар.

“Кыргыздын ак калпагы ак калпак бойдон калат. Бул иштелип чыккан баш кийим "Турана" деп аталат. Элдер "калпакты бузуп жатасыңар" деп жаман көрүп жатышпайбы. Тарыхка кайрылсак, калпактын үлгүсү бизге чейин да өзгөрүлүп келген. Муну менен дизайнерлер улуттук калпакты өзгөртүүнү максат кылган жок. Болгону жаштар кийгидей саркеч үлгүлөрдү иштеп чыгышты. Сунушталып жаткан калпактар 3 түргө бөлүнөт: 

1. Күнүмдүк, аны дайыма кийсе болот. 

2. Классикалык, кадимки оймолор түшүрүлгөн майрамдык баш кийим.

3. Спорттук. 

Белгилей кетсем, бул баш кийимдер эркектерге жана айымдарга арналып тигилет”,- дейт Чубак Бойконов.