“№47-түзөтүү мекемесинин жетекчисинин орун басарын бычак менен сайган деп айыпталып жаткан баламдын эч күнөөсү жок” дейт Мырзайым Токтобаева

2013-жылдын 26-декабрында Бишкек шаарында №47-түзөтүү мекемесинин жетекчисинин орун басары Милан Шакиевди белгисиз 4 адам бычак менен сайып кеткен. Бул кылмышка шектүү катары үстүбүздөгү жылдын башында Тимур Айткожоев жана Нуркемел Искендеров кармалган эле.

SUPER.KG порталына айыпталуучулардын бири Нуркемел Искендеровдун апасы Мырзайым Токтобаева кайрылып, баласынын күнөөсү жок экенин, жасабаган кылмышты мойнуна алдыруу үчүн сабашканын айтып берди.

“2014-жылдын башында балам Нуркемел Искендеровду күч органдары эч себеби жок кармап кетишкен. Кийин аны №1-СИЗОдо “мойнуңа аласың” деп катуу сабашыптыр. Мага да 3 күн катары менен белгисиз адамдар келип, “балаңар өз күнөөсүн мойнуна алсын, болбосо СИЗОдон сөөгү чыгат” деп коркутуп кетишкен. Адилеттик издеп бир канча жерге кайрылдык. Бирок алардан натыйжалуу жооп болгон жок”,- дейт Мырзайым Токтобаева.