Бишкекте "дайынсыз жоголду" деп изделип жаткан өспүрүм интернет-клубдан табылды

"Дайынсыз жоголду" делип жаткан өспүрүм бир нече күндөн кийин интернет-клубдан табылды. Бул тууралуу Бишкек ШИИББинин басма сөз кызматы бүгүн, 18-августта кабарлады.

Маалыматтарга караганда, милиция бөлүмүнө 37 жаштагы Адилет аттуу Бишкек шаарынын тургуну кайрылып, 14 жаштагы уулу дайынсыз жоголуп жаткандыгын кабарлаган. Аталган жарандын айтымында, анын уулу окуу курсуна кеткен бойдон кайрылып келген эмес. Өз алдынча уулун издеп көрүп, бирок жыйынтык чыкпагандан улам ал укук коргоо органдарына кайрылууга аргасыз болгон. 

14 жаштагы өспүрүмдүн жоголгондугу тууралуу арыз келип түшкөн соң, аны табуу үчүн Бишкек ШИИББинин кызматкерлери тарабынан издөө иштери башталып, дайынсыз жоголуп жаткан өспүрүм борбор калаадагы интернет-клубдардын биринен табылган. 

Милиция кызматкерлери өз кезегинде үйүнө барбай, бир нече күн интернет-клубда жүргөн өспүрүм менен профилактикалык баарлашуу өткөрүшүп, ата-энесине тапшырышкан.