Казакстанда мамлекеттик туу менен таштандыларды жаап койгон айдоочу жоопкерчиликке тартылат

Алматы шаарында Казакстан Республикасынын Мамлекеттик туусу менен таштандыларды жаап койгон жүк ташуучу унаанын айдоочусу жоопкерчиликке тартылат. Бул тууралуу бүгүн, 18-августта казакстандык басылмалар жазып чыгышты.

Маалыматтарга ылайык, айдоочунун мамлекеттик тууну туура эмес колдонгону тууралуу сүрөт социалдык тармактарда чыгып, катуу талкууга алынган. Жергиликтүү басылмалар “Милиция кызматкерлери тарабынан унаанын айдоочусу А.Ж.Есенбеков кармалып, анын 1988-жылы Алматы облусунун Карасай районунда туулгандыгы аныкталды. Суракта ал “курулуш таштандыларын бир нече күн мурун табылган туу менен жаап коюуну чечтим” деген. Эми анын Казакстан Республикасынын Административдик укук бузуулар жөнүндөгү кодексинин “Мамлекеттик тууну колдонуунун эрежелерин бузуу” беренеси боюнча жоопкерчиликке тартылышы күтүлүүдө” деп жазып чыгышты.