Баткендеги кыргыз-өзбек чек арасындагы атышуудан бир адам каза тапты

Бүгүн, 19-августта Баткен облусунун Кадамжай районунун Орто-Ынтымак айылынын аймагындагы чек арада курал колдонулган окуя орун алды. Бул тууралуу КРнын Чек ара кызматынын басма сөз кызматы билдирди.

Маалым болгондой, чек арачылар Кыргызстандын аймагындагы чек арадан 250 метр алыс жерден 20-25 адамдан турган топту көрүшкөн. Алар Өзбекстан менен болгон чек арадан мыйзамсыз өтүп, кыргыз-өзбек чек арасынан жүктү аткезчилик менен өткөрүүгө аракет кылышканы белгилүү болгон. Чогулган топ чек арачылардын токтотуу талабына баш ийбей, таш ыргыта башташкан. 

Кыргыз чек арачылар бир нече жолу асманга атышканда, аткезчилер буга көңүл бурбай, аскерлер алар тарапка курал колдонууга аргасыз болушкан. Мындан улам бир адам октон жаракат алган. Ага Чек ара кызматы тарабынан биринчи медициналык жардам көрсөтүлгөн, бирок ал ооруканага жеткирилип жатканда каза тапты. Ал эми калганы Өзбекстандын аймагына качып кетишкен.

Кармоо учурунда эки чек арачы жаракат алышты. Окуя тууралуу КРнын тиешелүү түзүмдөрү кабардар болуп, Чек ара кызматы окуя боюнча иликтөө амалдарын жүргүзүүдө.