Маликов Чүйдөгү айылдардын биринде бир "смотрящий" ислам аркылуу аракечтикти жойгондугу жөнүндө айтып берди

Дин боюнча адис Кадыр Маликов бүгүн, 21-августта журналисттер үчүн уюштурулуп жаткан тренингдин жүрүшүндө Чүй облусунун Ысык-Ата районундагы айылдардын биринде уюшкан кылмыштуу тобунун мүчөсү ислам аркылуу аймакка катуу тартип киргизгенин айтып берди.

"Башында бул айылда абал абдан начар болгон. Жаштар арак ичип, мушташып жүрүшчү. Үй-бүлөлөр туруктуу эмес эле.

Бир күнү бул айылдын "смотрящий" тургуну абакка камалып, бир мусулман менен таанышып калат экен. Аны менен жакшы мамиле түзүп, ислам динине берилет. Ал эркиндикке чыгып, өз айылына барып катуу тартип орното баштайт. Бир нече убакыт өткөндөн кийин ичип жүргөн жаштар ичпей калышат, үй-бүлөлөр жакшы жашай башташат",- деди Маликов.

Анын айтымында, Дин башкармалыгынын алсыздыгы, социалдык теңсиздик, соттун адилетсиздиги диндин күчөп кетишине жакшы шарттарды түзүп берет. “Бир жагынан динге берилүү терс нерселерге алып келет. Ошол эле учурда мунун жакшы жактары да бар”,- деп кошумчалады адис.