Индияда 8 жаштагы бала өзүнүн башынан чоң колуна операцияны наркозсуз жасатууну самаганын айтты

Индияда сейрек кездешүүчү генетикалык дарт менен төрөлгөн Кэлим аттуу бала көпчүлүктү таң калтырып келет. Анткени ал нормадан 2 эсе чоң колу менен жарыкка келген. Чет элдик ММКларда 21-августта жазылган маалыматтарга таянсак, учурда Кэлим 8 жашта, анын 12 килограмм салмактагы чоң колу дагы да өсүп, жергиликтүү дарыгерлерди бушайманга салууда.

Кэлим колунун эбегейсиз чоңдугунан жөнөкөй жумуштарды аткарууга алы келбейт. Жадакалса өзүнүн боосун да байлай албайт. Анын 27 жаштагы апасы Халема баласынын колунун абдан чоң экенин байкап келгени менен, жардам берүүгө чамасы жетчү эмес. Азыркы тапта баланын алаканынын өлчөмү 33 сантиметрди түзөт.

Бул дартынан көп учурда өспүрүмдөрдүн шылдыңына кабылган Кэлим: "Мен мектепке барбайм, анткени мугалим менин колумдан башка балдар коркуп жатышканын айтты. Алар мени сабайбыз дешти, кээ бири сабап да салышты. Мага өз алдынча кийинип-чечинүү оор. Көйнөгүмдүн топчусун топчулап, шымымды көтөрө албайм. Эгер операция жасашса, мен наркоздо болом да. Ошондуктан мен наркоз сайылбаган операцияны каалайм",- деген.

Айына 15 фут стерлинг (1500 сом) гана тапкан ата-эне баласына жардам берүүгө болгон аракетин жумшаган, бирок жыйынтык чыккан эмес. Жөнөкөй жумушчу кызматты аркалагандыктан, баласына жардам бере албаганына бушайман болгон 45 жаштагы атасы Шамин: “Биздин балабыздын колунун манжалары туура эмес бүгүлгөндүктөн, өз алдынча тамак иче албайт. Ошондуктан биз ага тамак беребиз. 2 манжасы менен кээ бир буюмдарды көтөрө алат, мисалы, суу куюлган стаканды. Биз балабызды ооруканага алып баралы дейбиз, бирок каражаттын жоктугунан бул тилегибиз ишке ашпай келет”,- дейт.

Кэлимдин колун текшерген дарыгер баладагы дарт лимфангиома (энесинин курсагында жатканда пайда болгон залалсыз шишик) экенин, аны дарыласа болорун айткан.