Алайда Алымбек датканын айкелин ачуу аземи өттү

Алай районунун Гүлчө айылында 21-августта Алымбек датканын айкелин ачуу аземи болуп өттү. Бул тууралуу бүгүн, 22-августта райадминистрациядан Аскар Машеров билдирди.

Кыргыз мамлекеттүүлүгүнүн түптөлүшүнө зор салым кошкон көрүнүктүү мамлекеттик ишмер, тарыхый инсан Алымбек датканын айкелинин ачылыш аземине КРнын Жогорку Кеңешинин Төрагасынын орун басары Төрөбай Зулпукаров, вице-премьер-министр Абдырахман Маматалиев, өкмөттүн Ош облусундагы ыйгарым укуктуу өкүлү Сооронбай Жээнбеков, Ош шаарынын мэри Айтмамат Кадырбаев, Алымбек датканын урпагы Чыныбек Абдыкапаров катышышты. 

Анда Алымбек датканын басып өткөн жолуна, кыргыз мамлекеттүүлүгүнүн түптөлүшүнө кошкон салымдарына кеңири токтолуп өтүштү. Андан соң майрамдык иш-чара "Курманжан датка" тарыхый этнографиялык музейинде уланды.

Алымбек датканын айкелин ачуу аземине бир катар бийлик өкүлдөрү менен кошо Ош шаарынын мурунку мэри Мелис Мырзакматов да барды. Мелис Мырзакматовду бийлик өкүлдөрү менен бирге көрүү айрымдар үчүн күтүүсүз болсо, "экс-мэр мындан саясат жасоодо" дегендер да чыгууда. Көпчүлүктүн көңүлүн бурган дагы бир көрүнүш иш-чарада Мырзакматов менен Ош шаарынын азыркы мэри Айтмамат Кадырбаевдин кучакташа учурашканы болду.