Чек ара кызматы: "Кыргыз-тажик чек арасындагы абал салыштырмалуу туруктуу"

Бүгүн, 26-августта Лейлек районунун Интернационал айылында эки өлкөнүн чек ара өкүлдөрү жолугушту. Анда кыргыз-тажик чек ара тилкесиндеги абалды стабилдештирүү, буга окшогон чыр-чатактарды болтурбоо маселелери талкууланды. Ошондой эле жолугушуунун жүрүшүндө эки тараптын чек ара өкүлдөрү ок атышуу болгон жерди карап чыгышты. Учурда кыргыз-тажик чек арасындагы абал салыштырмалуу туруктуу. Бул тууралуу Чек ара кызматынан билдиришти. 

Эске сала кетсек, кечээ, 25-август күнү Лейлек районунун Кулунду айылынын Сай аймагында тажик чек арачылары такталбаган аймакка 800-900 метр ичкери кирип келишип, чек ара бекетин орнотууга аракет кылышкан. Бирок буга кыргыз чек арачылары жол беришкен эмес. Натыйжада 30 мүнөткө созулган эки тараптуу ок атышуу орун алган.