Төрага Асылбек Жээнбеков элди Эгемендүүлүк күнү менен куттуктады

ЖКнын төрагасы Асылбек Жээнбеков кыргыз элин Эгемендүүлүк күнү менен куттуктады. Бул тууралуу ЖКнын басма сөз кызматы кабарлады.

Куттуктоонун тексти:

“Кымбаттуу мекендештер!

Сиздерди Жогорку Кеңештин атынан Кыргыз Республикасынын Көз карандысыздык күнү менен куттуктайм! Кыргыз Республикасы дүйнө коомчулугу тарабынан эгемендүү мамлекет катары таанылган. Элибиздин эркиндиги жана өлкөбүздүн көз карандысыздыгы – эң башкы дөөлөтүбүз. Ата-бабаларыбыз азаттыкты орнотуу үчүн эчендеген кылым бою тайгак кечүү, тар жолду басып өтүштү. Ар бирибиз көз карандысыздыкты, эгемендүүлүктү көздүн карегиндей сактоого, Кыргызстаныбызды өнүктүрүүгө салым кошушубуз абзел. Ошондой эле мамлекеттүүлүктү бекемдөө – жалпыбыздын ыйык милдет.

Бүгүнкү күндө жаңылануу мезгилин баштан кечирип жатабыз. Мындай жараяндын түпкү максаты элдин биримдигин сактоо, мыйзамды сыйлаган адилеттүү коом, калкы байгерчиликте жашаган, пайдубалы бекем мамлекетти курууга багытталган. Кудай буюрса, биргеликте күчтүү, гүлдөгөн Кыргызстанды курабыз. 

Дагы бир жолу Көз карандысыздык күнүңүздөр менен куттуктайм! Баарыңыздарга чың ден соолук, бакыт жана ийгилик каалайм!”