Каржы министрлиги: "Август айында өлкөнүн түштүк аймагын жылытуу сезонуна даярдоо боюнча иш-чаралар толук каржыланды"

Каржы министрлигинин басма сөз кызматы "Алдыдагы жылытуу сезонуна карата өлкөнүн электр жана жылуулук тарамдарын күчөтүү, ошондой эле түштүк регионунун керектөөчүлөрүн суюлтулган газ менен камсыздоо максатында Каржы министрлиги тарабынан Орусия Федерациясынын гранттык каражаттарынын эсебинен 261 миллион сом каржыланды" деп билдирди.

Белгилүү болгондой, каражаттын 225,4 миллион сом суммасындагы бюджеттик ссудалар төмөндөгүлөргө бөлүндү:

- “Электр станциялары” ачык акционердик коомуна – Ош шаарынын Салиева көчөсүндөгү 7 үйдүн кварталдык тарамдарын оңдоого 3,3 миллион сом;

- “Кыргызстандын улуттук электр тарамы” ачык акционердик коомуна – 40 МВА кубаттуулуктагы 110 кВ 2 даана трансформатор алууга жана орнотууга 62,4 миллион сом;

- “Ош электр” ачык акционердик коомуна – 16 МВА кубаттуулуктагы 35 кВ 2 даана трансформатор, 15 даана КРУН-10 кВ жана ВВ-10 кВ, ошондой эле КТП жана ТМ 10/0,4 кВ алууга жана орнотууга 100,1 миллион сом;

- “Жалал-Абад электр” ачык акционердик коомуна – 16 МВА кубаттуулуктагы 35 кВ 2 даана трансформатор, ошондой эле КТП жана ТМ 10/0,4 кВ алууга жана орнотууга 42,4 миллион сом;

- “Жылуулук менен жабдуу” муниципалдык ишканасына – 4 электр от казанын катуу отунга которууга 17,2 миллион сом.

Ошондой эле төмөндөгүлөргө акысыз негизде 35,6 миллион сом бөлүндү, алардын ичинен:

- Ош шаарынын мэриясына – газ баллондорун жана плиталарды алууга, 23 үй-бүлөлүк жатакананын жылытуу системин калыбына келтирүүгө 31 миллион 970 миң сом;

- Кара-Суу районуна – керектөөчүлөр үчүн газ баллондорун жана плиталарды алууга 3 миллион 629 миң сом.