Индияда 18 жаштагы кыз каргыштан сактануу үчүн жолбун итке турмушка чыкты

Индияда 18 жаштагы Мангли Мунда аттуу кыз жолбун итке турмушка чыкты. Иттин үлпөт тойго унаада алынып келингенин жана аны тургундар кыйкырык-сүрөөндөр менен тосуп алышканын 4-сентябрда чет элдик басылмалар жазып чыгышты. 

Кыздын итке турмушка чыгуусун айылдагы аксакалдар кеңеши кабыл алган. Алар бул жөрөлгө менен кызга, анын үй-бүлөсүнө жана бүткүл айылга тие турган каргыштан сактанууну ниет кылышууда. Эгер ал итке тийгенден баш тартса бактысыз болорун аксакалдар эскертишкени белгилүү болгон. Мангли Мунда бир нече айдан кийин гана эркекке турмушка чыга алат. Ага чейин кыз үй жаныбарына кам көрүшү керек. 

Бул боюнча Мунда: "Буга чейин жаман сөз, каргыштардан сактануу үчүн кыздардын итке турмушка чыгышканын жана алардын азыр бактылуу жашап жатышканын кошуналарыбыз айтты",- деп билдирген.