Таш-Көмүрдө "классташын сабап, анын өлүмүнө себепкер болгон" деп шектелген жаран изделүүдө

Таш-Көмүрдө "классташын сабап, анын өлүмүнө себепкер болгон" деген шектүү Талант Молдалиевди кармоо боюнча тиешелүү ыкчам иш-аракеттер жүргүзүлүүдө. Бул тууралуу 12-сентябрда Жалал-Абад ОИИБинин басма сөз кызматы билдирди.

Маалыматка караганда, 2014-жылдын 5-сентябрь күнү саат 23:00 чамасында Таш-Көмүрдөгү Ак-Суу-Келдиш аймагынын тургуну, 1988-жылы туулган Акылбек Бороевди өзүнүн классташы, Талант Молдалиев аттуу бала жанында жүргөн достору менен сабап салган. Буту-колун сындырып, денесине оор жаракат келтиргенден соң Таш-Көмүр шаарынын Түндүк кичи районунун Масалиев көчөсүндөгү жолдун жээгине таштап кетишкен.

А.Бороев оорукананын жандандыруу бөлүмүнө жаткырылып, бирок алган жаракатынан улам каза болгон.

Факты боюнча кылмыш иши козголуп, шектүүлөрдү кармоо боюнча ыкчам иликтөө иштери жүргүзүлгөн. Натыйжада Аксы районунун Кербен шаарынын тургундары 1988-жылы туулган А.Тургуналиев менен 1988-жылы туулган Э.Ниязбеков Таш-Көмүр ШИИБинин кызматкерлери тарабынан 11-сентябрь күнү кармалды.